[暴風登陸]150918

真係嚟料!

先有土耳其,後有阿根廷,南非都危危乎!大市轉頭回落,28300見頂即刻彈散,先插多2000,26000關口大受考驗。

大市勢必未來會跟住環球經濟顯疲憊。宜家嘅你,定必會心郁郁想撈底,但撈底,以宜家時勢,係咪正確嘅選擇呢?

過往經驗可以話俾我地聽,市場人士係唔會點話你聽確實大手「海底撈」嘅時候,講咗大家都冇金搵啦。要捉正今次嘅跌浪,一定係從長計議,目光要長遠,要以數年計,因為冇人可以捉到跌市最最最低點,但係挨近最低點,卻非無辦法。

首先跌市買股嘅類型,一定係我先前叫大家做定功課嘅績優股、實力派股。升市未免炒上咗一批high beta嘅股份,當然雖則跌市佢地會跌多啲,但係冇公司業績表現嘅支持,難以喺大市氣氛回暖嘅時候反彈,基本上跌完大多機會彈唔上。強股我唔多講喇,都係QQ、AIA、嗰啲業績長期聽話嘅股份。強烈建議唔好掂教育、藥住。汽車會喺貿戰尾聲後會變吸引,但強調一定要擺脫貿戰之後先至諗諗,依家大家可以mon住吉利比亞迪嘅成績表。

咁買嘅策略,一定要分批買,除非你喺好坐得嘅人,否則無謂傷自己嘅心。唔想太講究嘅,就用簡單平均法。除非你唔覺得煩,理想方法喺分至少五注入。用十年圖,列出五個心儀嘅價錢,作該策略嘅入水價。講究啲嘅,就可以以weighted average作為你嘅兵刄,即係所謂嘅小試牛刀,越低越重貨,直至跌浪完畢之時。

股市升市會有完嘅一日,跌市當然亦都唔會永恆。跌市要睇大勢,只要大家稍有耐性,唔好因少財失大財,咁最終埋單嘅回報,可能會超乎預期。

金融小弟