(傳載自己 - 一心深度見聞 收費頻道)

淺淡夜期及人民幣反彈

今日唔係星期二,唔係呢個頻道預設出post嘅時間,但係尋晚夜期升咗唔少,所以特別出多篇文講多少少。

無論係上個星期叫大家做Long Put篇文,抑或係前日叫大家止賺嗰篇,每篇起碼都有一兩個錯字 (冇錯呀有朋友估到我用速成打字),可見我當時打文有幾咁急。有朋友見到尋晚夜期升咁多,今朝已經好心急咁問係咪可以追貨,我反而想冷靜多少少,分析一下反彈嘅理由。

根據《華爾街日報》所講,美國方面打算喺施加額外關稅之前,同中國方面再進行多一次談判,就係呢個消息立即令夜期同人民幣匯價抽升。

首先我集中講「談判」呢樣嘢,美國近期嘅主要談判對象除咗中國之外,分別仲有就係加拿大、歐盟同日本,加拿大談判暫時仍然膠著;歐盟方面要上個月開咗個冇達成共識嘅會,今個月底會再開,預計技術細節要10月先開始傾,情況頂多屬於中性;日本仲衰,四月嗰陣美方向日本講「希望締結雙邊貿易協定」,人地首相都好識做,出哂力同你餵金魚、打高爾夫,傾咗咁Q多次,但係美方到今日仍然堅持要日方開放農業市場,偏偏呢個要求極之影響安倍嚟緊11月嘅大選.....結果前日安倍都頂唔順,講咗句「以牙還牙嘅制裁對大家冇好處」。

你睇到啦? 所謂「談判」,唔一定係一個轉捩點。就目前階段睇中美兩邊讓步可能性亦都唔大,更何況現時只係「可能談判」,唔係「落實談判」,所以我認為夜期同人民幣嘅升幅足夠反映「可能談判」呢個因素。對市港股嚟講,除非情況往好處發展,step one由「可能談判」變成「落實談判」,先夾高一浸,然後step two係談判完之後真係有嘢傾我成,咁先可以抑轉成個跌勢。問題係,暫時睇step one step two可能性都唔大,個市之後彈就算散嘅機會仍然居多。

現家我都冇哂淡倉喺手,但如果上述嘅情況冇變,彈到咁上下我都會沽返。其實有睇開我寫嘢嘅朋友應該都明白,上星期我叫大家開Long Put嘅注碼比平時明顯多啲,除咗因為專欄至今講嘅trade有累積利潤之外,亦都係因為上次出手時預期成功率較高。

題外話,有朋友問點解我上次要寫美股ETF可能做成Liquidity Squeeze嘅問題,係唔係睇淡美股。我重申多次Liquidity Squeeze對美股嘅影響暫時冇人估到,因為歷史上從來都未試過指數ETF成交量佔美股咁多,現時只能夠估計萬一出現Liquidiy Squeeze嘅情況係點,大家唔好以為呢個係一個負面因素,頂多係大跌市中後期嘅催化劑。

嚟緊打風,大家記得落雨要收衫,拜拜。

頻道訂閱︰http://m.intelligentjoy.com/columnDetail?id=7&lang=zh_tw