〔先下一城〕230818

土耳其貨幣危機、high beta洗板、人民幣續軟、特朗普公然反對美國加息……最近市場不確定性不斷疊高,種種問題十面埋伏,令到大市再度轉弱,且反彈力度多時唔夠、明顯構成低位不斷低嘅形勢,缸友們都冇哂癮,陸續散水,致成交萎縮。

宜家大市喺27000-28000把持住,不過可唔可以「緊守崗位」,小弟個人睇,機會都係屬微。

普普似乎覺得中美貿戰都未夠喉,連新興市場都惹埋一份。通常作為出口者嘅新興市場國家,關稅觸發原材料熊市,嚴重影響經濟,即使有控制高企通脹嘅需要,當地中央銀行根本跟唔上利率正常化嘅步伐。息口跟唔上,接而貨幣受挫,影響興資產市場,慫恿撤資嘅情況。土耳其只係先例,較為擔心唔係會唔會瀰漫至歐元區咁簡單,而係會唔會火燒連環船,觸及更多新興市場爆破泡沫,當中包括南非、墨西哥、印尼等等。正係呢個時候,若果對沖基金未能抵禦火勢,咁影響就會蔓延至主要經濟體系,好有97年嘅味道。所以唔可以對土耳其莫不關心,分分鐘累你「俾學費」。

另外,美國各領先經濟指標持續趨弱。最近二手房屋銷售,錄得連四個月下跌。貿戰嘅介入,無疑將會令情況糾纏下去。雖然關稅可以保著美國一哥嘅經濟地位,不過同時都要正面面對本地經濟核心問題。公然反對加息既不實際,效用亦唔長久。同早於美國經濟衰退嘅中國一樣,普普要多諗辦法刺激本土經濟,咁市場先至會有更明確嘅方向。不過選舉臨近,普普唔會有咁多空餘時間去諗呢啲嘢㗎喇~起碼對著全世界呢場戰爭,特朗普先下一城!

金融小弟