〔2018下半年展望備註〕040718



2018見證咗近兩年嘅慢牛市卻步。環球經濟增長普遍比預期理想,亦同時難逃經濟蓬勃漸趨消逝:通脹永遠都係經濟繁榮嘅死敵,因而中央銀行務必履行控制通脹嘅職責。利率近十年一直低企於歷史平均,正常化嘅趨勢,不外乎於意料之內。

正當市場以為剩係要mon住息口走向,美國卻意外及進取地轉態,宣布其貿易戰嘅計劃,擺出強硬保護主義嘅姿態,貿然指責美國錄得貿易逆差嘅貿易伙伴,更多次草擬及實施關稅等貿易制裁。捲入貿易風波嘅國家,其經濟數據於18年第二季明顯彰顯出貿易風波所帶來嘅種種影響,令到環球企業及市場對未來倍添悲觀。

歐元區自身亦都有其不確定性。英國脫歐進展至今依然未見有曙光;意大利亦都傳來脫離歐盟嘅消息;德國右翼派政黨於難民政策意見出現分歧,右翼最大兩個政黨一路以來嘅合作關係隨時凍過水,令到默克爾失去政權,國家主義嘅政治取向亦因而可能會被親歐盟派取替。最令人緊張嘅,係歐盟啱啱宣布以3000億美元關稅,作美國實施汽車關稅嘅報復。

新興市場簡直就係重災區。面對著油價及美元雙升,加上不時嘅政治動盪及貿易戰因素,新興貨幣大幅貶值,同時亦都令新興經濟末見起色。見及經濟動彈不起,中央銀行亦都未能緊貼利正常化嘅步伐,令到於新興市場嘅外資都紛紛叫走。

18年嘅下半章將會係一段發生乜嘢嘅故事呢?

息口方面似乎唔會點樣走樣,聯儲局應該都會年底前再加兩次,18年共加四次。照依家美國各經濟數據,紛紛暗示美國通脹仍然有上行空間,年底或19年第一季應該會達到聯儲通脹目標。

歐洲央行早前宣布息率至2019第二季維持不變,故經濟應該會環繞著政治動盪多啲。以最近嘅經濟數據,以及歐洲央行此舉,我推測下半年歐洲經濟難有明顯嘅增長加速。內地方面,人行應該唔會俾人民幣冧,反而我覺得現時顯緩和嘅經濟,適合內地喺呢個無乜束縛嘅情況底下,加緊推進降去槓桿政策嘅工作,減輕內地經濟產生泡末嘅壓力。貿易新興市場看似會持續被經濟低迷、落後利率正常化軌道、貨幣貶值及走資、政治風波呢個惡性循環捆綁著,前景都要似乎貿易戰嘅進展,及其對自身經濟嘅影響。

較關鍵嘅係特朗普究竟係乜嘢心態。最近實習期間,有幸可以同一位歐洲房地產市場資深人士交流,探討特朗普真正嘅取態。談討當中他有一個有趣嘅說法:特朗普可能心底裡都係支持自由貿易,但係前提係要喺公平嘅條件及環境底下與伙伴作貿易。不竟過火嘅保護主義,只會滯後環球經濟增長,甚至會引發衰退。加上美國公司嘅海外收入佔率一啲都唔細,故特朗普應該唔會自打嘴巴,採取相對上過份嘅貿易制裁措拖。所以,當美國貿易逆差有改善嘅跡象,貿易戰可能會稍為降溫。

呢種講法唔係唔啱,不過我認為都可能有補充嘅地方。美國長期嘅目標,眾所周知梗係要做世界之冠。但係美國,唔似可觀對手中國,係一個相對較飽和嘅已發展經濟體,意昧著要成為第一,較為有效率嘅做法,就只有削弱對手令到自己顯得更強,而非自我「發奮圖強」設法刺激增長。特朗普一心嘅目標,係「make America great again」,而非只係公平自由貿易咁簡單。

最近有一則新聞,報道指一名一直考第一嘅學生,最近考試首次被一直考第二嘅「爬頭」,呢一位一向名列前茅嘅學生心感不憤,結果殺害其「對手」。呢一位無辜嘅學生不幸被奪去生命,令家人感傷痛不已。

當然我要慎重聲明,任何情況大家切勿模仿以上血腥及違反道德行為!不過,當中嘅道理,同貿易戰嘅狀況,都有三分相似。



金融小弟