〔「拖字闕」〕150618

數個市場較為主要嘅焦點,於最近一兩日揭曉結果。美國方面,先前不論ISM指數、就業以及零售數據,維持良好表現。其後,昨日聯儲局亦一如預期加息0.25厘,不過今次有「買一送一」有贈品,由於聯儲局同一時間輕微上調經濟增長預測至2.8%,距離增長中軸3%再邁進一步,加上通脹終於回升至2%附近水平,故將今年加息次數嘅預測增至4次。美股暫時未有好大嘅回響,只係昨日臨近收市夾低咗100點,反映聯儲局「拖字闕」嘅計劃進展唔錯。內地方面,普遍出爐嘅經濟數據都強差人意:新增貸款、零售數據、貿易、以及通脹都反映經濟稍為趨向怠慢。雖則最近傳出嚟緊再次降準唔加息放水入市場,不過呢種單一化嘅策略,經濟效用開始流失。至於歐洲方面,央行行長宣布將息率於19年夏天前維持於現水平不變,下調經濟預測至2.1%,表示最近急速嘅經濟增長將緩和。至於量化寬鬆,行長宣稱將於今年十二月停止買債。

呢一輪嘅大贏家,非美元莫屬。強勁嘅經濟數據,以及歐洲央行意外地將加息嘅日子延遲,對美元可謂雙喜臨門。美匯指數先前受95水平阻力所引致嘅弱勢,於昨日單日內收復失地,撰稿時報94.91,升1.28%。十年期美債率亦借勢回吐,回落至2.95%。

港股成交最近明顯受制,單日成交多次少於1000億,故市況仍然維持於1000多點嘅區間上落。先前跟隨美股造好,企喺31000樓上。當大家以為企得穩嘅時候,轉頭特朗普有意於中興「放生協議」反口,加上內地數據疲弱,令到重磅內銀跌得最傷,拖累恆指重返30800以下嘅位置。當然,捲入中美貿易風波嘅中興,前日復牌如預期般被洗牌式拋售,收市大跌四成。

短期未來要留意嘅事項如下:
特朗普對向中國500億關稅嘅意決
人民幣走勢轉弱或否
下週美國房屋、PMI

建議中資金融暫時勒步,先觀望人行嘅對策及人民幣嘅走勢,故內銀弱勢可能仲有一定嘅空間。反而可以考慮小注近月銷售強勁嘅內房,搏一鋪細嘅降準。

金融小弟