〔不變應萬變?〕230418

上一排冇出刊,主要原因係市場因素冇太大變動。點知轉眼間風回輪轉,一個禮拜多啲就已經改頭換面。好似一煲燒緊嘅水,開始煮得越來越滾。

貿易戰上排嗰頭降溫,呢頭一個禮拜後又有新嘅火頭。中國一方面想試試水溫,提倡放寬入口汽車後,美國冇耐就反擊,於引入中國高科技產品提出限制。不過缸友們唔多信,結果一兩日後美國國會公布委員會報告,聲稱中興通訊、華為及聯想集團涉嫌商業間諜活動,事後亦引起中媒於文字上,就此事作出猛烈嘅抨擊。

消息當然無免對科技板塊表現有影響:錯,應該係話踩多一腳至啱。皆因蘋果料iPhoneX將會今年內停產,料次季收入或遜預期。可能亦都因為眾買家想等到今年尾嘅新model先至出動,令最新iPhone8紅有少少滯銷。冇計,科技股埋尾雙雙一面倒,當中瑞聲最傷,比先前嘅低位再低10元,到今日收市終告失守120元大關。

另外,最近美國聯儲嘅褐皮書,提及美國最近嘅經濟增長屬溫和,不過之後再傳聯儲相議後認為通脹達標嘅日子不遠矣,加息步伐有可能今年內加快,令到浮沉咗一段日子嘅十年債息一個星期內明顯抽升,週五挨近2.95厘嘅水平,打破呢次升浪創下嘅高位。

正當以為好友個陣輸咗一大截,內地人行又突如期來宣布降準放水。上證喺今次貿易戰嘅霧霾下,已經一度跌破3100,直指向下3000長城關口。國家隊此舉,都帶有想保住個市、保住個經濟嘅味道。

而香港方面,港元多次跌穿弱方保證水平,促使金管局連番出錢掃港元,惟加息方面維持冇聲氣:一貫港府嘅做法喇~不過都唔可以一言堂,咬定政府背後有拓樓市嘅動機。事關香港經濟雖現今相比兩三年前,情況有所改善;惟經濟復蘇步伐,比環球其化經濟體較為飄忽。以港府一向保守嘅立場,暫時呢一排耍翻一招獨門「不變應萬變」都人之常情:除非金管局方面開始唔夠錢駛去買港元喇。大家可以以盈餘1000億作準。若跌穿1000億,咁你睇新聞就要睇密啲喇。

好多人見個市現今及短期未來都會維持上落格局,就認為好有炒作嘅空間,甚至有啲認為「炒吓佢就會升㗎喇」。在此勸籲儘管意欲短期炒作嘅投資,大家時刻都要於投資前都麻煩睇睇新聞,自己評估吓值搏率,再定好投資策略,且後付諸而實行。若果唔係,到時你就升你唔賣,跌你又唔賣,而大市之後有啲乜嘢不測之風雲,你啲貨就好容易會變蟹貨啦。不過,與其做咁多功夫,避一避風頭,斟杯茶抖吓,都未嘗係一件壞事。

金融小弟