〔「能」者居之〕070418

貿易戰喺短短一個禮拜,再次爆發數輪新嘅制裁。禮拜初美國公布咗「全包宴」式嘅關稅清單,涉及超過1300種產品,當中一如預料較為集中高科技產品。不過,大家冇諗過咁快中國嘅姿態咁強硬,當日隨即草擬威脅美國,將會使用大豆關稅呢一張「皇牌」。香港禮拜二下晝,即刻俾淡友們重搥出擊,收市大市被夾低超過六百點。

美市亦受消息影響低開逾五百點。不過,數位美國官方嘅人士,都分別預計貿易戰將會受制,並且最終會達成協議,令市場對貿物戰嘅憂慮暫且得到舒緩。

其實呢個結論唔係無跡可尋。最近特朗普嘅一次「發爐騷」,就係美朝軍事。嗰次嘅撩交打,都講到添花龍鳳、五顏六色,當時新聞賣到好似真係會打仗。不過,去到最後普普咪又係「縮生」,而金正恩最尾咪又係啋佢都傻~何況今次嘅「戰爭」都只不過係貿易戰:咁和平、些毫都唔牽涉暴力嘅事宜,雙方又點會咁得閒擺咁多心機落去啊~

消息令到美市好似食咗「偉哥」咁,表現即刻生猛哂。真係有翻想當年港股單日收復過千點跌幅嘅影子,尾市扭轉乾坤V型反彈倒升近300點。

各官方人員話雖如此,不過特朗普懶理得你,於美國週四收市後變本加厲,提出新一輪1000億關稅方案。禮拜尾「偉哥」藥效過咗,美市又再次腳仔軟軟挫500點。

唔係話一定打唔成,我個人只不過覺得,喺我眼內最終打得成嘅機會,暫時不足以達到一半。所謂嘅貿易戰,其實不外乎於玩緊「大話骰」,中國同美國根本就係喺到「鬥吹」:邊個「蛇gwae」、邊個就會輸。所以,美國嚟緊將會繼續宣示主權,挑釁中方。而中國亦都唔會執輸,亦都唔會唔跟。正於剛才提及,呢種談判手法早已經喺北韓提倡核武嘅時候出現,沿用嘅都係博弈論嘅原理。

握握手,大家做個好朋友:有邊個唔想呢個世界可以咁純真啊~惟往往呢個世界都有佢現實嘅一面,每一個人、一間公司、一個組織,都有佢想得取嘅個人利益。而博弈論解釋,我方雖然可以與對方磋商達成「雙贏」嘅共識;但係當大家未能完全得知對方嘅行動及計劃嘅時候,為預防對方因個人利益作出任何對自己不利嘅出賣,雙方各自都唔會有任何動機去達致雙贏,導致「雙輸」嘅結果。北韓核武,同埋今次嘅貿易戰,都係呢翻理論活生生嘅例子。當然,雙輸都仲要分邊個輸多啲。特朗普現時嘅表態,顯出美國政府計過數,計到佢地輸少過中國:同人隻揪,你都會覺得自己好打過佢,你先會倡戰㗎嘛~但係,到最尾真係打完之後,又係唔係真係美國好打過中國呢?美國嘅經濟都係近年先至復蘇,叫做有啲增長,同中國比基本上得啖笑。再者,美國農業近年已經不濟,再係咁搞落去,首當其衝傷得最勁嘅一定係佢地。從人性道德,仰或係經濟嘅角度;到底又值唔值得呢班美國嘅農夫去做「白排兵」去犠牲?

相信特朗普今次加碼去到1000億,都只不過係chapter 2。嚟緊仲會有幾多次續集呢?據博弈論,個人認為一日唔坐底飲杯咖啡,將件事攤開嚟講傾掂佢,就一日都唔洗旨意覺得今次嘅風波會得到平息。

喺咁混亂嘅市況,最大嘅貼士就係要識得走位靈活。就好似喺一個有22個人嘅綠茵足球場上,齋企喺龍門口,又或者毫無目的咁亂跑,係唔會有波入㗎。同踢波一樣,球員大部分時間都唔會觸碰皮球。所以時刻都要清楚及判斷場上嘅情況,作出適當嘅走位同埋決定,先至能夠射入致命嘅入球。

球場且市場,俱「能」者居之:能屈能伸者乃居之也。

金融小弟