〔業績過後〕300318

光陰似箭,2018第一季嘅股市話咁快就告一段落。環球股市以選美佳麗般幾乎完美嘅慢牛姿態,踏上2018年新嘅舞台。恆指先前破歷史高位之後,一度更突破33000點。但係,股市不久難逃息魔嘅五指關,視為美國金融風險指標其一嘅十年債息,一度升穿2.9%嘅水平,故二月初發生咗呢次升浪第一次較為明顯嘅調整。正當大家畏高「tee-tee震」嘅時候,大市卻於30000關口附近見支持。維持幾個禮拜上落市之後,又殺出另一個程咬金。環球股市踏入三月期間,「普普」突然「發爛渣」,同中國「撩交打」開貿易戰,大玩貿易保護主義,搞到個市又多樣嘢驚。不過,呢一季都算係好尾收場嘅:今時今日嘅毛記,我絕對估唔到會同我讀小學嘅時候,喺便利店見到嘅「一蚊雜誌」上面寫嘅100毛,竟然係同一樣嘢!由當時嘅規模,發展成為今日一個正當上市公司,當之無愧為一個年青人值得學習嘅勵志故事。而毛記首日掛牌抽升數倍,收市市值逾17億嘅成果,確實百分百應得!

業績期亦都步向尾聲,公司嘅業績差唔多都已經公布哂。當中藍籌重磅股嘅成績表都交足功課、有板有眼,絕對能夠反映過去一年環球經濟復甦嘅情況。內險內房純利高,內銀不良貸款下降,科技股亦都省鏡。雖然騰訊比人話成績表有少少強差人意,不過個人認為係大眾已經對騰訊期望過高,不竟騰訊嘅業務發展真係超人一班。但係太高嘅期望,令到一間全年純利按年增長逾七成嘅大公司,都比人有失望嘅感覺。

踏入本年度嘅第二季,大家覺得環球金融體系會向邊個方向走呢?

市場憂慮嘅因素,最大同埋最重要都係中美貿易戰嘅事態發展。不竟未來日子特朗普幾時會「發爛渣」,同一個BB幾時會喊,都係大同小異嘅問題。息率唔係唔值得關注,但係因為最近貿易戰嘅介入,令未來息率走向俾貿易戰嘅進展牽引。貿易戰萬一如火如荼,物價難免上漲,到時聯儲局就只有貨幣政策令通脹受制,經濟踏入瀟滌嘅機會變大。

所以,有外媒嘅報道引述某市場人士嘅睇法,認為聯儲局依家執行緊「mission impossible」,係唔引發經濟瀟滌嘅情況底下,令失業率及通脹受控。有少少幻想空間嘅你地,覺唔覺得聯儲局好似鋼線過河呢?不過,經濟難免盛衰有時,只不過聯儲局咁樣嘅做法係拖延時間,經濟瀟滌始終係無法完全避免嘅事,不過拖到幾耐,就要睇吓聯儲嘅功力喇~

總而言之,若果貿易戰唔加速,環球金融市場都暫時叫做安全。貿易戰當中嘅過程,未免會為環球股市帶嚟新一輪嘅波幅,好似最近美市咁,閒閒地一日都有三百點以上嘅波幅。傳下個禮拜美國官方將公布關稅清單,到時股市睇怕都會大上大落。而港股近日繼早前32000封頂後,跌到30000點大關口附近嘅位置。喺貿易戰未有進一步發展嘅前提下,港股暫時理應維持上落市,不過一浪低一浪嘅大趨勢暫時走唔甩,29300理應係第一個支持位,上望30800。大家想搏反彈,宜嘗試趁大市急插嘅時候吼住好似騰訊、平保、或舜宇等強股,仍然小注為妙。

金融小弟