〔食粥食飯睇鷹鴿?〕210318

聯儲局議息結果將至,環球投資者當然都係敵不動我不動,處於觀望嘅狀態。投資者注目嘅,當然唔係呢一次嘅議息結果喇,因為過兩日加息0.25厘,幾乎係鐵一般嘅事實、一個公開嘅秘密。焦點就當然落喺鮑威爾嘅講到喇。不竟市場宜家所憂慮嘅「息魔」,係擔心今年加息步伐增速加四次,尤其鮑威爾新上任,市場仍然揣摩佢嘅取態,究竟係鷹定係鴿。我亦都唔係神仙下凡,揣測緊嘅人當然包括我在內!

不過表面啲睇,聯儲局今年度加四次息嘅可能性及可行性較低。一嚟最近美國經濟表現較上一兩季稍為緩和,就業數據亦開始有飽和跡象。二嚟今年聯儲局拖到三月先加息(假設議息結果加0.25厘息),要再加多三次息,目前美國嘅經濟未必承受得起。加上新上任,就算鮑威爾屬鷹派,都唔會一上任就為金融市場帶嚟震盪,尤其目前金融市場嘅憂慮有增無減,斷估鮑威爾都唔想踩多一腳啩~

反而值得大家關注更多嘅,係特朗普最近掀起嘅新一輪政治風波。炒人事少,不過提出帶嚟政治憂慮嘅政策事大。雖然貿易戰,特朗普都係「下巴輕輕」,不過大家有目共睹嘅,係市場對事件非常敏感嘅反應,當時道指更隨即兩日內跌千點。政治因素往往都係市場大禁忌其一。息口步伐都算係有經濟指標參照去揣摩,但係政治動盪絕大部分都係要推測涉及政治人物嘅思想。而喺呢個世界上,能完全解讀到特朗普思維嘅人,又會有幾多個呢?

轉個話題,最新因素方面,傳社交平台Facebook於洩露用戶私人資料事件,將會被聯邦「執正嚟做」,於美市兩日內被大規模拋售,兩日已經跌約一成。其實Facebook呢個問題都唔係新鮮,大家基本都預咗㗎喇,喺爭在幾時有人會出聲揸fit「鋤」Facebook咋嘛~非Facebook股民你地,咪又有多個藉口去買花生囉~

港股方面,科技股似乎冇乜受Facebook事件所影響,大市呢兩日都係低開高收。今年業績期靚仔嘅都尚算叫做多,反映去年環球經濟嘅表現,好似舜宇、平保、數間內房等等。不過講起內房,一線樓價開始出現調整嘅現象,故令龍頭萬科(2202)股價近日受壓,昨日更一度穿32元創月低。其實內房嚟緊呢一年都係會俾內地睇得較嚴。去槓桿政策,都會令一眾內房嘅消費買地能力,受到一定程度嘅限制。加上傳央行會調高存貸款基準利率,未來內房嘅日子,暫時唔會好似前排咁「興香」。

市場嘅憂慮是否變淡,我就唔咁作準。就算係,入唔入市都似乎你對風險嘅取向。自問可以承受一定程度風險嘅朋友們,宜逢跌分批入強股上望短線,止賺止蝕四至五番(4-5%)為妙。

金融小弟