〔惆脹情緒稍降溫?〕170318

環球股市持續回穩跡象,美國通脹符合預期達1.8%,市場懶理特朗普掀起「炒人潮」,傳炒完國務卿之後下個目標為美國國家安全顧問,基本上要大執位。其實手法嘅目標同習總一樣,都係要做到「一人之下、萬人之上」,只不過習總馴服所有現今手下,而特朗普就篩選自己認為完美嘅團隊。雖市場料下週聯儲議息會上調息率,惟暫時都未有息口步伐加快嘅警號出現,令港股順理成章企穩31000樓上,亦令焦點重新集中喺強勢股即將會公布嘅業績,錯過咗呢個浪嘅你就冇辦法喇,忌高追、剝吓花生喇。

講翻上次提及過嘅問題,究竟點解港匯咁弱,金管局未見有明顯嘅舉動嘅呢?其實暗裡自打響算盤,當中不得不提本港利率調節機制。當港匯下見低方保證水平嘅時候,為維持港元同美元掛鈎制度嘅兌換範圍,金管局務必會喺本地銀行買走佢地港元嘅儲備,令流通嘅貨幣基礎收縮,從而令香港嘅實際利率上升。尤其現今美國同香港嘅息差不斷拉闊,呢個措施有助減少投資者喺外匯市場套息沽空港元嘅動作。所以金管局時刻要保持「水浸」,以防他日發生特如其來嘅貨幣危機,都可以臨危不亂拆解危機。當然,其實金管局暗地裡都想港匯偏弱。既可以多一個藉口支持利率正常化、利好貿易;又可以吸引海外投資資金流入本港市場,情況依然在控底下,金管局點會say no?

環球經濟都過咗約十年低息環境,故最近掀起利率正常化嘅走勢,香港都唔會係例外,所以大家都會見到現今樓宇嘅買家,用途轉趨自住,而昔日炒樓嘅風氣,其實已經風光不再。

金融小弟