〔兩會期間維持橫行區〕070318

隨著市場消化部分貿易戰帶嚟嘅負面情緒,美股跌勢見止,反覆靠穩。港股亦都跟隨華爾街嘅走向,昨日幾乎收復前日近700點嘅跌勢。chok嚟chok去嘅股市,究竟嚟緊去向如何?嚟緊又係唔係做淡倉嘅時候呢?

最近特朗普就先前所提倡嘅貿易戰,出翻少少口術,具體指關稅仍有談判空間,以便舒緩投資者崩緊嘅情緒。其實又唔係冇原因嘅~皆因美國若與中國打貿易戰,最大可能嘅結果,就係兩敗俱傷。美國貿易嘅規模,同中國嘅都有一段距離。基本上,特朗普低估咗拖低中國貿易經濟嘅難度。以為美國仲係一哥,拖冧任何經濟體易如反掌,實質上於某方面仍然有好大進步空間。再加上近來特朗普嘅gimic,都係嚟自於美股嘅慢牛市。雖然呢個牛市唔係佢一個人嘅功勞,但係佢一直於此事宜邀功。若展開貿易戰,將迅速毀滅美市橫跨兩年嘅牛市:斷估特朗普都唔會咁蠢,目睹手上所謂嘅「戰績」毀於一旦啩~

內地方面,兩會啱啱於禮拜一開始,20號閉幕。市場對兩會嘅內容有憧憬,當然呢種憧憬炒作,只會應效於個別有關嘅板塊。但係在此都勸喻,若睇緊文章嘅你想喺兩會呢次茶飯分翻一杯羹,不仿可以等候到兩會將至嘅時候,先至考慮個別板塊,因為此舉可以容許大部分兩會傳出嘅消息統一。雖回報部分可能已被消化,不過相對地亦同時對消部分嘅風險,減低買蟹貨嘅機會。

港元最近嘅弱勢,相信大家都應該有留意到。(若果冇嘅,本人真係建議緊貼時事)近日弱勢更加較為顯著,美電本週亦跌穿7.83,與7.85弱方兌換保證率距離拉近。有市場揣測弱勢有機會歸咎於近日股市撤資嘅活動。不過,個人又覺得提出呢一番言論未免尚早。較正確嘅說法都係講返息差,因為老實講,香港未曾開始跟隨美國加息嘅步伐,有套息嘅情況,一啲都唔出奇,做低港元。部分投資者更擔心港元會唔會被大鱷狙擊,我只可以話暫時根本未有任何證據證明呢個說法:大家都無謂作出太離地嘅揣測喇~

至於前景,市場都冀望下週二嘅美國通脹數據。由最近美國出嘅經濟數據,可見美國經濟最近冇先前咁標青,故個人推測通脹將唔會有啲乜嘢驚喜。內地方面,最新貿易及通脹嘅數字將臨週末公布。同樣地,正面嘅驚喜機會較微。冇乜明顯利好或利淡嘅消息,加上市場存在多樣隱憂,料港股於29400至30800橫行,維持忌入市。

金融小弟