〔震盪期:唔貼市你都唔好掂〕020318

近排環球市況開始震盪,加上各企業紛紛業績準備出爐,港股日間嘅波幅分分鐘玩死人!

論最新外圍嘅因素。鮑威爾先前於回應最新經濟數據嘅言論,被市場「鷹化」。鮑威爾都知自己講錯嘢,隨即之後一兩日出嚟補飛,幫市場定驚。原先經濟數據強勁,一度刺激美匯指數上破90.5嘅水位。不過,一波未完,一波又起,特朗普臨近禮拜尾又是「撩交打」,暗示同中國於鋼鐵貿易市場宣戰,喺未來美國經濟表現多添一個問號,掀起市場另一波嘅憂慮。消息觸發美股連同美匯疲態,美債息亦於2.8附近見支持,臨近週末即刻彈翻上2.86。睇嚟美市都係暫時未會有晴朗的一天喇~

除外,內地政治上出現咗大變。習總最近宣布修改主席任期不得多於兩屆嘅憲法,使主席可以有無限期任期。市場對變更嘅睇法偏向兩極化,而事實上咁具爭議性嘅事態,的確對內地經濟有利有弊。個人睇亦都係一半一半,表面上此舉基本上係反文明嘅舉動,無別於數十年前長權政治嘅毛時代,經濟上同開放改革明顯背馳,於經濟國際化嘅路步伐後退。不過,若習總嘅政策仍然可以一直維持以經濟開放為大方向,長遠嚟講反而可以令內地經濟得到平穩。雖則長遠可能有助內地經濟變得平穩,不過短期內對於轉趨疲憊及飽和嘅內地經濟嚟講,多少都對於扭轉經濟弱勢有阻滯,不竟同一個領導人,政策方針唔會有太大出入。除非習總能夠作出靈活嘅變通,否則內地經濟於解決經濟軟弱將面臨更大嘅挑戰。

外圍因素仍處於不明朗狀態。打個比喻,平時落街踢波嘅你,天文台若果話即將懸掛八號風球嘅時候,你仲會唔會去踢呢?

金融小弟