〔特別版:財政預算案後感〕010318

續受外圍因素纏繞,美國消費數據強勁,鮑威爾其後公開嘅言論被市場對號入座,判為傾向鷹派。除外,最新內地製造業PMI亦比市場預期低,僅達50.3,頻臨中軸線50嘅水平。港股上幾日反彈之後轉下,北水持倉者見港股缺乏承接力,自然會重組自已嘅投資組合,加上外圍負面因素嘅配合,令短線一定出現沽盤,港股通出現淨賣出都不足以為奇。

股市熾熱嘅氣氛稍為緩和,更令大家關注本年度嘅財政預算案,尤其據稱來年度嘅budget喺歷來最高。今年之所以錄得歷史新高嘅盈餘,當然歸咎於股市樓市旺足成年喇。大家要明白,香港政府嘅財儲備,土地儲備佔據唔少,故樓價上升有助強健港府嘅財力。所以港府向來對樓市嘅操控時刻手緊,務求阻止樓市出現震盪,加保政府財庫。

不過,有錢都唔代表要益街坊。要「恨」嘅,大家都係繼續羡慕鄰近澳門年年有錢派喇。不過講真,俾你政府人人都派幾千元:又如何?金額又唔大,又幫補唔到貧富懸殊,陣間又話經已移民嘅又返嚟拎錢走,到時咪又係不切實際~

咁多錢喺手,既然唔派錢,大家自然都會冀望會宣布即將實行嘅好措施,咁政府先有充分嘅理據去決定唔派錢,令市民爭取更好嘅得益。不過,港府今年一如既住:「唔跌眼鏡地令大家跌眼鏡」。稅制嘅改變難以稱得上有大嘅效果。將四萬五三層遞進制,改為五萬蚊四層遞進制。稅階「跳標」由5%微調至4%。假設改稅制嘅措施係較為針對中產,咁一名月入五萬大元嘅市民,喺今次嘅稅改從中每個月嘅得益,只係得250元!好似改咗好多嘢,但係最終都只係一個月請你食餐飯咋~不過,好彩都有退稅同埋減利得稅夾雜著幫補吓,整體上稅務上嘅改變一般般喇。

政府於民生各方面撥款嘅安排,宜家討論都仲係言之尚早,其成效都要等到各相關部門,點樣善用各自獲分派嘅budget,先至有偈傾。但係預算案最可圈可點嘅地方,就係資助全民DSE考試費用,同埋海洋公園嗰一萬張飛。DSE相比其他國際公開試已經較為便宜,故只有家庭明顯缺乏經濟能力嘅考生,先至係方案中嘅target。依家政府宣布2019年DSE全民免費:嘩,咁即係阿茂阿秀都可以去報名?就算唔講對下屆考生成績嘅影響,方案涉及金額都要花費1.8億元!

除外,派海洋公園飛呢個project都唔知係邊個嘅主意。單從客觀嘅角度去睇,全港中小學生逾70萬人,惟門票數量僅得一萬張。換句話講,即係70個人爭1張飛。用或然率theory嘅expected value去計,每名學生嘅expected gain僅480/70=6.85元!我先唔講港府竟然會形容去主題公園係一個良好嘅學習體驗,一張480元嘅門票,獲派嘅或然率得僅1.4%:呢度涉及金額嘅3.1億,值得咁樣去消費咩?

其實今次財政預算都唔係衰哂,當中好似綜緩派糖嘅政策係值得支持,但係部分公帑被用於效果明顯不佳嘅方案入面,降低成件事嘅efficiency,故顯然有進步空間。當中浪費嘅金錢,會唔會可以集中係啲效果較佳嘅方案?當然講多無謂,不竟當局者迷,旁觀者清。財政預算案難免美中不足,但係咁冇成效嘅方案,就絕對要杜絕。幸好嘅係,盈餘當中,港府只係用咗四成去回饋市民,若果唔係,不被善用嘅公帑總額只會更高。

金融小弟