〔業績好開始,定或惡夢之前奏?〕270218

近排美國債息有回落嘅跡象,高見2.95附近後急回至2.86嘅水平。而美元先前強勢到90.5嘅水平左右再度回落,一度跌低於89大關口。喺雙重利好因素底下,美股自黑色情人節之後,反彈幅度都差唔多有大半。昨日更加因為最新美國房屋銷售比預期差,舒緩市場對加息步伐嘅憂慮。

雖然美股反彈為利好外圍因素,不過論幅度港股都唔係好跟得貼,至今只回升至31000樓上。可能因為業績期傍近,令市場偏向先觀望,對於搏反彈,情緒明顯較為審慎。都冇話唔啱嘅,不竟今次牛市導火線其一,就係憧憬去年環球經濟復甦可以提高企業業績嘅表現。

而最近首當其衝公布業績嘅板塊係本地銀行股。普遍都冇令到市場失望,恆生更為大家帶嚟一個小驚喜。雖然匯豐盈利未如市場預期,不過個人覺得未如市場預測,某程度上皆因市場過於樂觀,尤其係匯豐喺新興市場嘅計劃,我諗市場冇諗過會蝕到咁嘅水位。反而有些少失望嘅,係匯豐嘅息差收入,同埋如今仍未有回購計劃嘅最近消息。不過,大前題係盈利的確有增長,亦都只係略遜預期,又唔洗咁大反應。如無意外,受惠於去年環球經濟於低息環境復甦,似乎尚未公布業績企業嘅成績都應該唔會唔對板,就算遜於預期都唔會太過樣衰,相信各持倉者都會話「但願如此」喇~

不過,講吓環球前景,「盛衰有時」係經濟、股市嘅特徵。更重要嘅係,股市通常係預先反映經濟短期未來嘅走向,英文有名為leading variable,意指股市嘅走向,相比經濟走勢,永遠都係「帶頭」嗰個。最近美國加息嘅步伐,為全球經濟體嘅利率帶嚟上升壓力,故將利淡今年企業盈利走勢。就算美國只係加3次息,0.75厘對企業項目投資可以係「唔惹少」。消化利率走向方面,企業嘅消化能力,往往比金融市場嘅消化能力低,意昧著就算市場能夠消化加息步伐,都無阻為企業盈利能力增添壓力。倘若企業「頂唔順」0.75厘嘅息口變動,來年美國,以至全球經濟必定轉勢。假設經濟於明年第一至二季轉衰嘅話,咁股市勢必比經濟更早反映企業盈利能力下降嘅跡象。今次咁強勢嘅牛市,其相應嘅熊市睇怕都長達數月。計翻少少「婆乸數」都知道,熊市可能於第三季將牛市「打靶」。

對平倉者嚟講,以上對佢地當然影響不大,反而可能睇熊市剝花生都睇得幾心爽添。若果你係持倉者,又相信經濟興盛於明年將結束,應該點對部署好呢?

斷估冇人會係想喺熊市開始之後先至放貨架喇,過往數次嘅熊市,大家都知道熊市嚟得急嘅時候,散戶基本上同美斯單刀入波一樣,絕多數都係「走唔甩」。美國最近一日跌一千點,當時大家都已經慌失失。若果下次幅度嘅點數乘二,唔知市場到時會點反應呢?

你可能諗,喺熊市未嚟之前要減磅,有邊個唔知啊?要付諸實行,真係知易做難。喺牛市、升市、有人接貨嘅時候減磅,基本上係與眾背馳,違反人類最大特徵:「羊群效應」。十年前嘅海嘯,今時今日財經節目都依然有家庭觀眾,徵詢十年前蟹貨嘅意見,可想而知喺牛市之前,走唔切嘅後果會係點。當然,我以上嘅言論,對持倉者睇好股市下半年嘅表現,絕不構成任何嘅反對。只係我自己個人見解,不過希望大家都見好就收,免除後患為妙。

金融小弟